മദ്യം ഇനി വീട്ടുപടിക്കൽ

മദ്യം ഇനി വീട്ടുപടിക്കൽ; രാവിലെ ഏഴു മുതൽ രാത്രി എട്ടു വരെ ഹോം ഡെലിവറിക്ക് മുംബൈ നഗരസഭയുടെ അനുമതി..

കോവിഡ് വ്യാപനം കൂടുന്നതിനിടെ മദ്യം ആവശ്യക്കാർക്ക് വീട്ടിലെത്തിച്ചു നൽകാൻ നഗരസഭ അനുമതി നൽകി. ബ്രിഹൻ മുംബൈ മുനിസിപ്പൽ കോർപ്പറേഷൻ ആണ് നഗരത്തിൽ മദ്യം വിൽക്കാനും വീട്ടിൽ എത്തിച്ചു നൽകാനും അനുമതി നൽകിയത്. വെള്ളിയാഴ്ച പുറത്തിറക്കിയ ബി എം സി ഉത്തരവ് പ്രകാരം സാധുവായ ലൈസൻസുള്ള വിൽപന ശാലകൾക്കും തദ്ദേശീയ ലഹരിപാനീയങ്ങളും ഇന്ത്യൻ നിർമിത വിദേശ മദ്യവും വീട്ടിൽ എത്തിക്കാൻ അനുവാദം നൽകി. അതേസമയം മദ്യവിൽപനശാലകലുടെ കൌണ്ടറിൽ വിദേശ മദ്യം മാത്രമേ വാങ്ങാൻ കഴിയൂയെന്നും സർക്കുലറിൽ പറയുന്നു.

ഹോം ഡെലിവറി അനുവദിക്കുമ്പോൾ, സംസ്ഥാനത്ത് വർദ്ധിച്ചുവരുന്ന COVID-19 കേസുകൾക്കിടയിൽ പാലിക്കേണ്ട ചില കർശന നിയമങ്ങൾ നടപ്പാക്കാൻ പ്രത്യേക സമിതിയെ ഏർപ്പെടുത്തിയിട്ടുണ്ട്. ഡെലിവറി പ്രതിനിധികൾ നിർബന്ധമായും COVID- ന് അനുയോജ്യമായ മാനദണ്ഡം പിന്തുടരുകയും മാസ്കുകൾ ധരിക്കുകയും സാനിറ്റൈസറുകൾ ഉപയോഗിക്കുകയും സാമൂഹിക അകലം പാലിക്കുകയും വേണം. രാവിലെ ഏഴിനും രാത്രി എട്ടിനും ഇടയിൽ മാത്രമേ സർവീസ് അനുവദിക്കുകയുള്ളൂവെന്ന് ബി എം സി ഹോം ഡെലിവറി സമയം പരിമിതപ്പെടുത്തി.

കൊറോണ വൈറസ് കേസുകൾ മഹാരാഷ്ട്രയിൽ നിയന്ത്രണാതീതമായപ്പോൾ, സംസ്ഥാന സർക്കാർ പ്രവൃത്തിദിവസങ്ങളിൽ രാത്രി കർഫ്യൂ പ്രഖ്യാപിക്കുകയും ‘ബ്രേക്ക് ദി ചെയിൻ’ കോവിഡ് -19 പ്രതിരോധ പ്രവർത്തന പദ്ധതിയുടെ ഭാഗമായി മറ്റ് നിയന്ത്രണങ്ങൾക്കിടയിൽ വാരാന്ത്യ ലോക്ക്ഡൗൺ ഏർപ്പെടുത്തുകയും ചെയ്തു. സംസ്ഥാനത്തെ ആദ്യ വാരാന്ത്യ ലോക്ക്ഡൗൺ വെള്ളിയാഴ്ച രാത്രി 8 മണിക്ക് ആരംഭിച്ചു, തിങ്കളാഴ്ച രാവിലെ 7 മണി വരെ ഇത് തുടർന്നു. വാരാന്ത്യ ലോക്ക്ഡൌണും മറ്റ് നിയന്ത്രണങ്ങളും ഏപ്രിൽ 30 വരെ തുടരും.