മലയാളത്തിലെ എക്കാലത്തെയും സൂപ്പർ ഹിറ്റ് സിനിമയായ സ്‌ഫടികംത്തിൽ മോഹൻലാലിന്റെ ചെറുപ്പകാലം അഭിനയിച്ചു കൊണ്ട് പ്രേക്ഷക ശ്രദ്ധ നേടിയ താരമാണ് രൂപേഷ് പീതാംബരന്. നീണ്ട നാളത്തെ ഇടവേളയ്ക്ക് ശേഷം തടിച്ചുവീര്‍ത്ത ശരീരവുമായി മെക്സിക്കന്‍ അപാരതയില്‍ വില്ലനായി തിളങ്ങിയ രൂപേഷ് തടി കുറച്ച്‌ ചെറിയ പയ്യനായി റഷ്യയില്‍ നായകനാകുന്നു. മാസങ്ങളോളം കഠിന പ്രയത്നത്തിലൂടെ രൂപേഷ് പുതിയ ലുക്കിലേക്ക് എത്തുകയായിരുന്നു.
മെക്സിക്കന്‍ അപരാതയ്ക്കു വേണ്ടി രൂപേഷ് ശരീരഭാരം കുറച്ചിരുന്നു. എന്നാല്‍ അതിനേക്കാള്‍ ഭീകരമായ ട്രാന്‍സ്‌ഫോര്‍മേഷന്‍ ആണ് റഷ്യക്ക് വേണ്ടി താരം ചെയ്തിരിക്കുന്നത്. കുലുമിന ഫിലിംസിന്റെ ബാനറില്‍ നിതിന്‍ തോമസ് കുരിശിങ്കല്‍ സംവിധാനം ചെയ്യുന്ന ത്രില്ലര്‍ മൂവിയില്‍ ഗോപിക അനില്‍, രാവി കിഷോര്‍, ആര്യ മണികണ്ഠന്‍, സംഗീത ചന്ദ്രന്‍ എന്നിവരുള്‍പ്പെടെ രൂപേഷ് പീതാംബരന് ആറു നായികമാരാണുള്ളത്.
സബ്‌ജെക്ടിനു മാത്രം പ്രാധാന്യം നല്‍കി അനുയോജ്യരായ അഭിനേതാക്കളെ കണ്ടെത്തി തന്റെ ആദ്യ സിനിമ തന്നെ ഒരു പരീക്ഷണമാക്കിയിരിക്കുകയാണ് സംവിധായകന്‍ നിതിന്‍ തോമസ് കുരിശിങ്കല്‍. പോസ്റ്റ് പ്രൊഡക്ഷന്‍ പുരോഗമിക്കുന്ന റഷ്യ ഉടന്‍ റിലീസ് ചെയ്യും. മെഹറലി പൊയ്ലുങ്ങള്‍ ഇസ്മയില്‍, റോംസണ്‍ തോമസ് കുരിശിങ്കല്‍ എന്നിവര്‍ ചേര്‍ന്നാണ് റഷ്യ നിര്‍മ്മിക്കുന്നത്. മിജോ ജോസഫ്, ഡാലി നിധിന്‍, സിജോ തോമസ്, ഫെറിക് ഫ്രാന്‍സിസ് പട്രോപ്പില്‍, ടിന്റോ തോമസ് തളിയത്ത, ശരത്ത് ചിറവേലിക്കല്‍, ഗാഡ്വിന്‍ മിഖേല്‍ എന്നിവരും നിര്‍മ്മാണ പങ്കാളികളാണ്. ക്യാമറ: സൈനുല്‍ ആബിദ്, എഡിറ്റര്‍: പ്രമോദ് ഓടായഞ്ചയല്‍, പി.ആര്‍.ഒ: പി.ആര്‍.സുമേരന്‍
